PROTEA-krieketspeler Colin Ingram en sy bruid Megan Olivier het op 12 Junie by Mentors-landgoed getrou.

Die landgoed het homself bewys as ’n trou-destinasie en het nou ook erkenning hiervoor gekry deur ’n beeldsending van die bruilof op Top Billing, ’n aktualiteitsprogram op SABC.

Hierdie beeldsending was op 24 Junie.

"Hierdie is wonderlike reklame en blootstelling vir Jeffreysbaai en die Kouga-area en sien ons dit ook as erkenning vir die bydra wat Mentors tot besigheid in ons omgewing maak," sê Githe-Meret Muir, bruilof-koördineerder by Mentors.

Colin en Megan was met die eerste oogopslag deur die landelikheid van Mentors-landgoed weggevoer.

Colin, wie se ouers ’n plaas op Thornhill het, en Megan se bruilof was elegant tog eenvoudig. Die kleure was swart en wit met ’n tikkie groen - groen appels was vir die naamkaartjies gebruik!

Die sjokolade-mousse troukoek wat in donker sjokolade ganache en Belgiese-sjokolade gedrapeer was, is deur Alexandra van Port Elizabeth gemaak.

Megan se trourok, gemaak deur Creations by Lauren, was soos iets uit ’n feëverhaal. Die rok, wat deur Megan self ontwerp is, het ongeveer drie weke geneem om te maak. "Ek wou nog altyd ’n prinses-tipe rok maak, aangesien dit elke jong meisie se droom is om ’n prinses te wees," sê Lauren.

Die rok het bestaan uit 12 meters Italiaanse satyn. Die korset was skuinsoor gedrapeer en het styf op die buustelyn tot die heup gepas. Die bo-stuk het bestaan uit kant wat met krale en 1 200 Swarovski-kristalle versier was.

Die onder-romp was ook met gekraalde kant versier, terwyl die bo-romp en trein netjies daaroor gedrapeer was. Die bo-romp was ook met pêrels en Swarovski-kristalle versier.

Die blomme vir die bruilof was alles wit. Groenigheid en vullers het direk van die Ingrams se plaas op Thornhill gekom.

Die gaste kon tydens die onthaal heerlik smul aan die disse wat Inge Woeke, die sjef by Mentors, voorberei het.

Colin en Megan wou die spyskaart so eenvoudig as moontlik hou.

Volgens Githe, het hulle baie goeie terugvoering van die huwelikspaartjie ontvang.

Graag wil ons saam met Mentors, en die hele Jeffreysbaai, vir Colin en Megan voorspoed vir hul huwelik toewens en dankie sê vir die bietjie glans wat hulle na ons dorp gebring het.

’n SPAN diewe het verlede Sondagoggend tussen 1vm en 6vm op die Humansdorp Spar toegeslaan.

Met die oopsluit van die perseel het die bestuurder aan diens onmiddellik onraad vermoed toe die alarmstelsel nie wou deaktiveer nie en het sy gemerk dat iets skort toe sy sien dat die twee LCD-televisiestelle weg is.

Sy het haar onmiddellik na die plaaslike polisiestasie gehaas om die inbraak aan te meld.

Met die ondersoek het die Polisie en forensiesespan gevind dat die diewe toegang tot die perseel deur die dak bo die kantoor gekry het. Al die drade van die alarm, asook ander drade is geknip.

Die diewe het met een televisie weggekom, aangesien die ander televisiestel op die dak gevind is, asook twee skootrekenaars, die CCTV-stelsel, sigarette, kaas, polonie, hoender en lyfsproei.

Volgens die bestuur het die winkel derduisende rande se skade gelei, aangesien die winkel ook nie daardie dag kon oopmaak vir besigheid nie.

Gelukkig kon meeste teen die Maandag herstel word en kon besigheid weer voort gaan soos normaal.

Volgens Carl Trahms van Smhart-sekuriteit op Jeffreysbaai is die inbraak die werk van uiters professionele mense. "Ons het wel die eienaar reeds twee weke voor die inbraak gekontak om hom inkennis stel dat die sekuriteitstelsel opgegradeer moet word, weens ’n vlaag van groot inbrake in die omgewing die afgelope tyd," sê Trahms.

"Ongelukkig was die eienaar uitstedig en kon daar nie sonder sy toestemming opgegradeer word nie."

Die polisie ondersoek steeds die saak.